स्वास्थ्य बीमा ऐन जारी भएको एक वर्षपछि बीमा बोर्डले पायो कार्यकारी निर्देशक
काठमाडौं, २० मंसिर । सरकारले स्वास्थ्य बीमा बोर्डको कार्यकारी निर्देशकमा रमेशकुमार पोखरेललाई नियुक्ति गरेको छ ।
गत सोमबार बसेको मन्त्रिपरिषद बैठकले विराटनगर घर भएका पोखरेललाई नियुक्ति गरेको हो ।
स्वास्थ्य बीमा ऐन जारी भएको एक वर्षपछि स्वास्थ्य बीमा बोर्डको कार्यकारी निर्देशक चयन भएका हुन् । राजनीतिक खिचातानीका कारण निर्देशक चयनमा ढिलाई भएपछि सरकारले गत सोमबारको बैठकबाट निर्देशकका लागि अन्तिम ५ जनामध्येका तेस्रो नम्बरमा रहेका पोखरेललाई नियुक्त गरेको हो ।
स्वास्थ्य बीमा बोर्डको कार्यकारी निर्देशकको लागि सात जनाले आवेदन दिएका थिए । जसमध्ये ५ जनालाई स्वास्थ्य तथा जनसंख्या मन्त्रालयले चयन गरेको थियो । गत कात्तिक ६ र ७ गते लोक सेवा आयोगले ती पाँचजना निवेदकको अन्र्तवार्ता लिएको थियो । अन्र्तवार्ताको आधारमा आयोगले पहिलो नम्बरमा दामोदर बसौला, दोस्रो नम्बरमा श्रीमान् कार्की र तेस्रो नम्बरमा रमेशराज पोखरेललाई चयन गरेको थियो । अन्तिम तीनमा छानिएकालाई आयोगले कात्तिक ७ गते नै स्वास्थ्य मन्त्रालयमा सिफारिस गरेको थियो ।
आयोगले सिफारिस गरेको एक महिनापछि सरकारले कार्यकारी निर्देशक चयन गरेको छ । ऐन अनुसार स्वास्थ्य मन्त्रालयले गत भदौ २४ गते कार्यकारी निर्देशकको लागि निवेदन आह्वान गरेको थियो ।
आयोगबाट तेस्रो नम्बरमा परेका पोखरेल नेपाल राष्ट्र बैंकका पूर्व निर्देशक हुन् ।
बोर्डमा कार्यकारी निर्देशक नियुक्त नहुँदा पछिल्लो ४ महिनामा कुनैपनि काम हुन सकेको थिएन भने बीमा विस्तार कार्य समेत प्रभावित बनेको थियो ।