भक्तपुर, १७ असोज । स्वास्थ्य तथा जनसङ्ख्या राज्यमन्त्री डा. सुरेन्द्रकुमार यादवले शिक्षा र स्वास्थ्य स्थानीय तहलाई दिन नहुने बताएका छन् । 

विश्व मुटुरोग दिवसको अवसरमा आज भक्तपुरको शहीद धर्मभक्त राष्ट्रिय प्रत्यारोपण केन्द्रमा आयोजना गरिएको कार्यक्रममा उनले स्थानीय तहले शिक्षा र स्वास्थ्यको जिम्मा लिन नसक्ने दाबी गर्दै यसलाई जिल्लामै राख्नुपर्ने बताए । देशको २४ सय वडामा कुनै पनि स्वास्थ्य संस्था नरहेकाले अब ती वडामा स्वास्थ्य संस्था सञ्चालन गर्न सरकार लागिरहेको बताए । उनले  कुनै पनि संस्था सञ्चालन गर्न जागिरे मानसिकता त्यागेर अगाडि बढ्नुपर्नेमा जोड दिए । 

देशमा ८० प्रतिशत जनता गाउँमा रहेको तर, गाउँमा १० प्रतिशत डाक्टर पनि नजाने गरेको कार्यक्रममा बताए ।  राज्यमन्त्री यादवले शहीद धर्मभक्त राष्ट्रिय प्रत्यारोपण केन्द्रका लागि भने आवश्यक डाक्टर पठाउन पहल गर्ने बताए । मुटुरोग, क्यान्सर, मिर्गौला, कलेजोजस्ता विभिन्न रोग बढ्दै गएकोमा चिन्ता व्यक्त गर्दै उनले धूमपान र मद्यपान गर्ने शिक्षित व्यक्तिको सङ्ख्या बढ्नु थप चिन्ताको विषय रहेको बताए । कार्यक्रममा केन्द्रका कार्यकारी निर्देशक डा. पुकारचन्द्र श्रेष्ठले अस्पतालमा अहिले मिर्गौला डायोलोसिसका लागि ६ सय , मिर्गौला प्रत्यारोपणका लागि ४ सय  र कलोजो प्रत्यारोपणका लागि १८ जना बिरामी पालो कुरेर बसेको बताए ।  बिरामीको अत्यधिक चाप बढे पनि जनशक्ति र ठाउँ अभावका कारण पालो कुराउनु पर्ने अवस्था आएको उनले बताए I सरकारले ठाउँ र आवश्यक जनशक्ति उपलब्ध गराए अहिलेको भन्दा तेब्बर सेवा दिन सकिने उनले बताए । 

ओपन हार्ट सर्जरीसहितको २४ घण्टे मुटु उपचार सेवा सञ्चालन गर्न सक्ने उच्च प्रविधिको उपकरण केन्द्रसँग रहे पनि आवश्यक चिकित्सक नहुँदा मुटुरोग उपचार सेवा २४ घण्टा सञ्चालन गर्न नसकिएको उनको भनाइ थियो । उनले सरकारसँग २४ सँै घण्टा मुटु रोग उपचार गर्न सक्ने गरी जनशक्ति र ठाउँ प्रदान गर्न माग गरे । 

कार्यक्रममा मुटुरोग विशेषज्ञ डा. मोहनदेव भण्डारीले कोटेश्वरबाट पूर्व दैनिक हुने घण्टाँै जामले धेरै मुटु रोगी बिरामीको ज्यान लिएको बताए I  पूर्वका बासिन्दाका लागि नजिक एवं सहज सेवा पाउने गरी यस केन्द्रमा मुटुको २४ घण्टे उपचार सेवा सञ्चालन गर्नु अति आवश्यक रहेको बताए । केन्द्रले अहिले दैनिक मुटुरोग परीक्षणसँगै क्याथ ल्याब सेवा पनि सञ्चालन गरिरहेको छ । 

कार्यक्रममा मुटुरोग विशेषज्ञ डा. सम्पूर्णमान तुलाधर, अन्तर्रा्ष्ट्रिय क्षेत्रका डा. एलि मियूलियर, केन्द्रका नर्सिङ इञ्चार्ज दुर्गा श्रेष्ठ, क्याथ ल्याब सेवाका नर्स सञ्चिता दुलाललगायतले केन्द्रमा  २० करोडभन्दा बढीको सुविधासम्पन्न उपकरणलाई जनशक्ति अभाव का कारण नियमित प्रयोगमा ल्याउन नसकेको बताए  I उनले अत्याधुनिक उपकरण प्रयोगमा ल्याउन जनशक्तिको व्यवस्था गरिदिन सरकारसँग आह्वान गरे । कार्यक्रममा केन्द्रको मुटु सेवामा सहयोग पु¥याउने शहीद गङ्गालाल हृदयरोग केन्द्रमा विशेषज्ञ डा. राजीवराज भण्डारी र केन्द्रकी पूर्व नर्सिङ इञ्चार्ज इन्दिरा प्रधानलाई सम्मान गरिएको थियो । 

रासस

Hamro Doctor