अब सबै जिल्लामा स्वास्थ्य बीमा : परराष्ट्रमन्त्री ज्ञवाली
काठमाडौं, १२ मङसिर । परराष्ट्र मन्त्री प्रदीपकुमार ज्ञवालीले सरकारले चाँडै नै सबै जिल्लामा स्वास्थ्य बीमा कार्यक्रम लागू गर्ने बताएका छन् ।
प्रदेश ५ पत्रकार समाजले आज काठमाडौमा आयोजना गरेको गुल्मीको हुङ्गाकी मिगौलापीडित १३ वर्षीया बालिका बन्दना भण्डारीलाई सहयोग हस्तान्तरण कार्यक्रममा उनले अहिले २५ जिल्लामा स्वास्थ्य बीमा कार्यक्रम लागू भएकाले चाँडै नै देशभरका सबै जिल्लामा लागू गर्ने जानकारी गराए ।
उनले स्वास्थ्य बीमा कार्यक्रम लागू भएपछि यसले मृत्युलाई जित्न नसकिए पनि अकालमा आर्थिक अभावले ज्यान गुमाउनु पर्ने बाध्यताको अन्त्य गर्न सहयोग पु¥याउने बताए । उनले स्वास्थ्य बीमाले मानिसको जीवनस्तरमाथि उठाउन र सरकारले परिकल्पना गरेको समृद्ध नेपाल बनाउन थप सहयोग पु¥याउने बताए । मन्त्री ज्ञवालीले सरकारले अभियानको रुपमा ल्याएको समाजिक सुरक्षा कोषको नकारात्मक टीकाटिप्पणी मात्रै बढी भएको उल्लेख गर्दै यसले ३५ लाख श्रमिकको हितमा काम गर्ने बताए ।
योगदानमा आधारित सामाजिक सुरक्षा योजनाको नबुझेर विरोध गरेको उनको भनाइ छ । ‘सरकारले कामै गरेन भनेर टिप्पणी गर्नु स्वागतयोग्य कुरा भए पनि सकारात्मक कामको पनि मूल्याङ्कन गर्नुपर्छ’ उनले भने, यो सरकार मुलुकलाई समृद्धि बनाउने अभियानमा लागेको छ ।’
कार्यक्रममा मन्त्री ज्ञवालीले बालिका भण्डारी र उनकी आमा लक्ष्मी भण्डारीलाई उपचारका लागि दुबईमा सङ्कलन गरिएको दुई लाख आठ हजार पाँच सय हस्तान्तरण गरेका थिए । दुबईमा वैदेशिक रोजगारीका क्रममा रहेका कुवेर लुइँटेल र खिम केसीले संयोजन गरी नेपालमा कलाकार बैकुण्ठ महतमार्फत रकम उपलब्ध भएको हो । बन्दना अहिले महाराजगञ्जस्थित शिक्षण अस्पतालमा उपचारत छिन । रासस
