चिकित्सकको टोलीद्वारा किरिया घरमै पुगेर नमूना संकलन
काठमाडौं, ८ माघ । चिकित्सकहरुको टोलीले काठमाडौंको चाबहिलमा किरिया बसेका परिवारहरूको स्वास्थ्यमा देखिएको स्वाईन फ्लूको नमूना संकलन गर्नुका साथै स्वास्थ्य चेकजाँच गरेको छ ।
काठमाडौं धोवीखोला घर भएका ५० वर्षीय एकजना व्यक्तिको ‘इन्फ्लुएन्जा – ए’ का कारण सोमबार मृत्यु भएपछि घरपरिवारका आफन्तले किरिया बसेकै स्थानमा आएर उपचार र नमूना संकलन गर्न आग्रह गरेका थिए ।
स्वाईनफ्लूले मृत्यु भएका व्यक्तिका आफन्तहरू चावहिलमा काजकिरियामा बसेका छन् । विभागको चिकित्सकहरूको टोलीको नेतृत्व गरेर गएका डा.प्रकाश शाहले एकजना बच्चासहित छ जनाको नमूना संकलन गरिएको छ । ‘घाँटीका साथै विभिन्न परीक्षणहरू गरेका छौँ’, उनले भने, ‘अरु नमूना पनि संकलन गरिएको छ । अहिले नै त्यस्तो डराइ हाल्नुपर्ने अवस्था छैन । तर, सर्तक रहनुपर्छ ।’
डा.शाहले भने, ‘कसैलाई रुघा खोकी र ज्वरो आएको छ भने भने ढिला नगरेर नजिकको अस्पताल वा स्वास्थ्य चौकीमा पुगेर चेकजाँच गराउनु पर्छ । हेलचेक्राइ गर्नु हुँदैन ।’
हिमाल अस्पतालमा उपचार गराउने क्रममा ती ५० वर्षीय व्यक्तिको मृत्यु ‘इन्फ्लुएन्जा – ए’ बाट मृत्यु भएको रिपोर्ट आएपछि परिवारजनले सर्तकता अपनाएका हुन् ।
सो विषयमा जानकारी पाएपछि उपप्रधान एवम् स्वास्थ्य तथा जनसंख्यामन्त्री उपेन्द्र यादवले चिकित्सकहरूको टोलीलाई निर्देशन दिएर उपचारमा कुनै कसर बाँकी नराख्न भनेपछि डाक्टरहरुले जाँच गरेका थिए । स्वास्थ्यमन्त्री यादवको निर्देशन लगतै चिकित्सकको टोली मंगलबार साँझ किरिया बसेको ठाउँमा पुगेर स्वास्थ्य परीक्षण एवं नमूना संकलन गरेको हो ।
