हात्तिपाइले नियन्त्रणका लागि एकै चरणमा १५ जिल्लामा औषधि वितरण अभियान हुँदै
काठमाडौं, १० फागुन । सरकारले हात्तीपाइले रोगको जोखिममा रहेका १५ जिल्लामा एकै चरणमा हात्तिपाइले औषधी खुवाउने भएको छ ।
१५ जिल्लाका ७८ लाख भन्दा बढी मानिसलाई हात्तीपाइले विरुद्धको औषधि खुवाउने भएको हो ।
स्वास्थ्य तथा जनसंख्या मन्त्रालयले आउँदो फागुन १५ देखि पाचँथर, इलाम, झापा, मोरङ, बारा, लमजुङ, पर्वत, बागलुङ, कपिलबस्तु, दाङ, बाँके, बर्दिया, कैलाली र कञ्चनपुर गरी १५ जिल्लाका ७८ लाख ४९ हजारलाई औषधि खुवाउने लक्ष्य लिएको छ
औषधि वितरण कार्यक्रमका लागि ६ हजार २ सय ५ जना स्वास्थ्यकर्मी परिचालन हुने मन्त्रालय अन्तर्गतको इपिडिमियोलोजी तथा रोग नियन्त्रण महाशाखाले जानकारी दियो ।
सरकारले यस वर्षको कार्यक्रमलाई २० करोड ६० लाख ७० हजार रकम विनियोजन गरेको महाशाखाका निर्देशक डा विवेक कुमार लालले बताए।
आम औषधि सेवन, बिरामी खोजपड्ताल र हाईड्रोशिल सर्जरीको लागि रकम छुट्याईएको निर्देशक लालले स्पष्ट पारे ।
सरकारले सन् २००३ देखि हात्तिपाइले रोग विरुद्धको औषधि वितरण थालेको हो । सरकारले यो रोग सन् २०२० सम्ममा एक प्रतिशतमा झार्ने लक्ष्य लिएको छ।