स्वास्थ्य मन्त्रालयका सचिव घिमिरेको सरुवा
काठमाडौं, ३ वैशाख । स्वास्थ्य तथा जनसङ्ख्या मन्त्रालयका सचिव चन्द्रकुमार घिमिरे सरुवा भएका छन् ।
सोमबार बसेको मन्त्रिपरिषद् बैठकले स्वास्थ्य सचिव घिमिरेलाई महिला, बालबालिका तथा ज्येष्ठ नागरिक मन्त्रालयमा सरुवा गरेको हो । गत माघ ९ मा उनी उद्योग, वाणिज्य तथा आपूर्ति मन्त्रालयबाट स्वास्थ्य मन्त्रालयको प्रशासनतर्फ सरुवा भएका थिए।
करिब तीन महिनाअघि कार्य व्यवस्थापन गर्न भनेर दुई सचिव खटाइएको भनेता पनि सरकारले घिमिरेलाई छोटो समयमै सरुवा गरेको छ ।
घिमिरे स्वाथ्यमन्त्रालयमा बहाल भएको करिब ३ महिनामै सरुवा भएका हुन् ।
यसअघि घिमिरेसहित पुष्पा चौधरी पनि स्वास्थ्य सेवातर्फ सचिवमा बहाल थिइन् । स्वास्थ्य सचिव घिमिरे सरुवा भएसँगै अब स्वास्थ्य मन्त्रालयमा एक मात्रै सचिव रहने भएको छ । सरकारले सचिव घिमिरेसहित ३ जनालाई सरुवा गरेको हो ।
जसमा काठमाडौं महानगरपालिकाका प्रमुख प्रशासकीय अधिकृत यादवप्रसाद कोइरालालाई सङ्घीय मामिला तथा सामान्य प्रशासन मन्त्रालयको जिम्मेवारी दिइएको छ ।
साथै भर्खरै सचिवमा बढुवा भई पदस्थापन हुन बाँकी डा हरिप्रसाद पौडेललाई प्रधानमन्त्री तथा मन्त्रिपरिषद् कार्यालयमा खटाइएको छ ।