रुघाखोकी प्रभावित क्षेत्रमा कर्णाली सरकारले पठायो औषधि र चिकित्सक
सुर्खेत, १५ वैशाख । कर्णाली प्रदेश सरकारले मौसमी रुघाखोकी प्रभावित हुम्लाको ताजाकोट गाउँपालिकामा हेलिकोप्टरमार्फत औषधि र चिकित्सक पठाएको छ ।
नेपाली सेनाको हेलिकोप्टरबाट आइतबार बिहान औषधि र चिकित्सक पठाइएको हो ।
प्रदेशका सामाजिक विकासमन्त्री दल रावका अनुसार संघीय सरकारको समन्वयमा चिकित्सक र औषधि पठाएको हो ।
अब छिट्टै नै त्यहाँको समस्या समाधान हुने उनको भनाइ छ । मन्त्रालयले पठाएको टोलीमा प्रदेश स्वास्थ्य निर्देशनालयका डा. टेकराज भट्टराई, डा. केएन पौडेल र केशव अधिकारी, एक जना प्यारामेडिक्स, निर्देशनालयका कर्मचारी श्याम आचार्य र ल्याब टेक्निसियन सहभागी छन् ।
उनीहरुले आजैबाट उपचार सुरु गरेको जनाइएको छ । टोली केही दिन प्रभावित क्षेत्रमै रहने छ ।
करिब तीन सातालेखि फैलिएको मौसमी रुघाखोकीले हालसम्म ९ जनाको मृत्यु भइसकेको छ भने तीन सय भन्दा बढी बिरामी भएका छन् ।
