सागमा सहभागि हुन आएका १३ खेलाडीमा डेंगु, ब्लुक्रसमा उपचार हुँदै
काठमाडौं, २३ मंसिर । नेपालमा जारी १३ औँ दक्षिण एसियाली खेलकुद (साग) मा सहभागि हुन आएका श्रीलंकाका खेलाडी बिरामी भएका छन् ।
१३ जना श्रीलंकन खेलाडीमा डेंगु देखिएपछि उनीहरुलाई त्रिपुरेश्वरस्थित ब्लुक्रस अस्पतालमा भर्ना गरिएको हो ।
डेंगु संक्रमित मध्ये महिला फुटबलर गायथ्री नानायक्कराको अवस्था गम्भीर रहेको र उनको आइसीयूमा राखेर उपचार भइरहेको ब्लुक्रस अस्पतालले जनाएको छ ।
महिला फुटबलको प्रतिस्पर्धाका लागि गायथ्री पोखरामा थिइन् । स्वास्थ्यमा समस्या देखिएपछि बिहीबार बेलुका उनलाई काठमाडौं ल्याइएको थियो । डेंगु संक्रमण भएर अस्पताल भर्ना हुनेमा एथलेटिक्सबाट स्वर्ण विजेता अमासा डी सिल्भा पनि छिन् ।
अन्य ६ खेलाडी भने ब्लुक्रसमै उपचारपछि डिस्चार्ज भएर होटेल फर्कि सकेका छन् भने अन्यको उपचार हुँदैछ । बिरामी हुनेमा धेरैजसो एथलेटिक्सका खेलाडी रहेको श्रीलंकाली टोलीका मेडिकल प्रमुख डा. लाल इकनायकेले बताए ।
श्रीलंकाली टोलीले आफ्ना खेलाडी नेपाल आउनुअघि नै संक्रमित भएको अनुमान लगाएको छ । सागको बन्द प्रशिक्षणका क्रममा श्रीलंकाको सुगथादसा स्पोर्टस् होटेलमा बसेकामध्ये पाँच खेलाडीलाई अहिले डेंगु देखिएकाले उतै संक्रमित भएको अनुमान गरेको हो ।
