रुपन्देही १३ माघ । तिलोत्तमा नगरपालिकाले कुष्ठरोगी पत्ता लगाउन निःशुल्क स्वास्थ्य शिविर सञ्चालन गरेको छ । कुष्ठरोग प्रभावित सजिलै स्वास्थ्य संस्थामा नआउने भएकाले सबै प्रकारका छाला रोगीको परीक्षण गर्नेगरी निःशुल्क चर्मरोग शिविर आयोजना गरिएको नगरपालिकाका सिनियर अहेव अधिकृत ईश्वरी पौडेलले बताए । 

तिलोत्तमा नगरपालिकामा १४ जना कुष्ठरोग प्रभावित औषधी खाइरहेको स्वास्थ्य शाखाले जनाएको छ । नगरपालिकाले आइतबार टिकुलिगढ स्वास्थ्य चौकीमा शिविर आयोजना गरिएको थियो भने सोमबार सेमराबजार स्वास्थ्य चौकीमा शिविर चलाएको छ । शिविरमा छाला रोग विशेषज्ञ डा. श्यामराज उपाध्याय र डा. विनोद बढईले स्वास्थ्य परीक्षण गरेका थिए । 

शिविरमा निःशुल्क औषधी समेत वितरण गरिएको सिनियर अहेव अधिकृत गणेश गौतमले बताए । आइतबार टिकुलिगढ स्वास्थ्य चौकीमा शिविर सुभारम्भ गर्दै तिलोत्तमा नगर उप–प्रमुख जागेश्वरी चौधरीले कुष्ठरोग पनि अरु रोग सरह भएकोले यसलाई कसैले पनि लुकाउन नहुने बताईन । समयमैं उपचार गरे कुष्ठरोग निको हुने भएकाले यो रोगप्रतिको अन्धविश्वास हटाउन उनले सबैलाई आग्रह गरिन ।
 
छालासम्बन्धी जुनसुकै समस्या भएकाले पनि शिविरबाट लाभ लिन सक्ने बताउँदै उप–प्रमुख चौधरीले आइतबार छुटेकाहरुलाई सोमबार सेमराबजार स्वास्थ्य चौकीमा हुने शिविरमा आउन अनुरोध गरिन ।

स्वास्थ्य कार्यालय रुपन्देहीका क्षय–कुष्ठ अधिकृत टिकाराम अधिकारीले नदुख्ने, नचिलाउने भएकाले धेरैलाई आफू कुष्ठरोग प्रभावित भएको थाहा नहुने भएकोले उनीहरुको पहिचानका लागि सबै प्रकारका छाला रोगीका लागि लक्षित गरी शिविर आयोजना गर्नुपरेको बताए । 

यो रोग लाग्दा रातो तथा हल्का फुस्रो रङ्गको दाग देखिने, अनुहारको छाला बाक्लो हुने, छालामा गिर्खा देखिने, स्नायुमा असर गर्दा हात खुट्टामा छुँदा थाहा नहुनुका साथै मांशपेशी पनि कमजोर हुने बताए । नियमित उपचारबाट कुष्ठरोग पूर्णरुपमा निको बताउँदै उहाँले कुष्ठरोगको उपचार स्वास्थ्य संस्थामा निःशुल्क हुने र यदि समयमै उपचार नगरेमा अपाङ्गता हुन सक्ने उल्लेख गरे । 

कार्यक्रम तिलोत्तमा वडा नं. १४ का वडाध्यक्ष सोहन चौधरीको अध्यक्षता, नगरपालिकाका सिनियर अहेव अधिकृत ईश्वरी पौडेलको स्वागत तथा अर्का सिनियर अहेव अधिकृत गणेश गौतमको सञ्चालनमा भएको हो ।
 
कुष्ठरोग आँखाले देख्न नसकिने माइकोब्यक्टेरियम लेप्र नामक सुक्ष्म किटाणुबाट लाग्ने रोग हो । यो रोगले खास गरेर छाला र स्नायुमा असर गर्छ । हात खुट्टा निरन्तर झमझम गर्नु, पोल्नु र निदाए जस्तो हुनु, अनुहारमा कमिला हिँडे जस्तो हुनु र छालामा रगंहिन दाग देखिनु तथा दागमा कुनै बस्तुले घोचे पनि अनुभव नहुनु कुष्ठरोगका लक्षण भएको  चिकित्सको भनाई छ । 
 

Hamro Doctor