चितवनमा उपचाररत काेराेना संक्रमित एक युवककाे मृत्यु
चितवन, २७ असाेज । भरतपुर १० स्थित कलेज अफ मेडिकल साइन्सेस शिक्षण अस्पताल (पुरानो मेडिकल कलेज) उपचाररत थप एकजना काेराेना संक्रमित युवककाे मृत्यु भएकाे छ ।
मृत्यु हुनेमा सर्लाही जिल्लाकाे चक्रघट्टा गाउँपालिका वडा नम्बर १ बस्ने ३१ वर्षीय पुरुष रहेकाे अस्पतालले जनाएकाे छ । अस्पतालका अनुसार उनकाे मंगलबार बिहान ३ः२० बजे मृत्यु भएको हाे ।
उनी यहि असोज २३ गते अस्पतालमा भर्ना भएका थिए । उनमा असाेज २६ गते काेराेना संक्रमण पुष्टि भएकाे थियाे । निमाेनिया देखिएका उनकाे काेभिड आईसियूमा उपचारकाे क्रममा मृत्यु भएकाे अस्पतालले जनाएकाे छ ।
यसअघि चितवन मेडिकल कलेजमा उपचाररत भरतपुर महानगरपालिका १० का ७८ वर्षीय वृद्धको साेमबार बेलुकी ८ बजेतिर मृत्यु भएको थियाे ।
Last modified on 2020-10-13 09:14:38
स्वास्थ्यकर्मीसमेत रहेका पाठक हाम्रो डक्टर न्यूजका चितवन ब्यूरो प्रमुख हुन् ।