तिहारको पटाकाले क्यान्सर गराउला है !
काठमाडौं,१८ कार्तिक । कोरोना महामारीका कारण तिहारमा अन्य वर्षको जस्तो चहलपहल छैन । तरपनि मानिसहरुले मनोरञ्जनका लागि अनेक उपाय अपनाउने गर्छन् ।
दिपावलीका समयमा मनोरञ्जनका लागि पड्काइने भूँइचम्पा र पटाकाबाट निस्कने धुवाँले फोक्सोको सङ्क्रमण, हृदयघात र क्यान्सरको सम्भावना हुने भएकाले सचेत हुन अपिल गरिएको छ ।
यस्ता सामग्रीको प्रयोग गर्दा वातावरण प्रदूषण हुनाका साथै पटाका पड्काउँदा निस्कने सेतो ज्वालामा अलिमुनियम रहेको र यसले दिमाग र फोक्सोका लागि हानिकारक भएको भन्दै चिकित्सकहरुले सचेत रहन आग्रह गरेका छन् ।
क्यान्सररोग विशेषज्ञ डा.प्रकाश राज न्यौपानेले पटाकाबाट निस्कने रातो ज्वालामा लिथियम र स्ट्रोनटियम हुने भएकाले त्यसले बच्चाको हड्डीको विकासमा असर पार्ने बताए ।
पटाका र भूइँचम्पामा क्यान्सरको कारकतत्व हुने भएकाले यस्ता वस्तु बनाउन प्रयोग हुने रसायन तत्वबाट निस्कने सल्फर डाइअक्साइड, कार्बनडाइअक्साइड र कार्बन मनोअक्साइडजस्ता विषालु ग्यासबाट फोक्सोको क्यान्सर र क्रोनिक ब्रोङकाइटिस रोग लागी अकालमै मृत्यु हुने सम्भावना भएकाले मनोरञ्जनका नाममा यस्ता सामग्री प्रयोग नगर्न उनले आग्रह गरेका छन् ।
सरकारसँग यस्ता हानिकारक वस्तुको आयात, व्यापार र प्रयोग नगर्न, नगराउन सशक्त अनुगमन गर्न पनि आग्रह गरेको छ ।
कोरोना महामारी भनिएपनि मानिसहरुले खुला सीमानाका कारण लुकिछिपी पटाखा ल्याएर बाल्ने क्रम देखिन सक्छ । त्यसकारण सबै सचेत हुनु आवश्यक छ । किनकी क्यान्सर जस्ता रोग र अन्य दीर्घरोगीलाई पनि पटाखाले प्रभावित बनाउन सक्छ ।
