काठमाडौं, ११ भदौ। चिकित्सा शिक्षा सुधारको माग राख्दै आन्दोलनरत प्रा.डा गोविन्द केसीले काठमाडौ नेसनल मेडीकल कलेजलाई दिएको सम्बन्धनमा प्रधानमन्त्री र शिक्षा मन्त्रीको पनि संलग्नता रहेको आरोप लगाएका छन् । 

आइतवार विज्ञप्ती जारी गर्दै डा. केसीले जालझेलपुर्ण तरीकाले दिइएको सम्वन्धन तत्काल खारेज नगरे भदौ २१ बाट पुन अनसन बस्ने समेत घोषणा गरेका छन् । विज्ञप्तिमा आफुसंग पटक पटक भएका सम्झौता विपरीत काठमाडौ उपत्यकामा मापदण्ड नपुगेको कलेजलाई सम्बन्धन दिन कुलपति समेत रहेका प्रधानमन्त्री र सह कुलपती शिक्षा मन्त्रीको पनि संलग्नता रहेको आशंका गरेका छन् । ‘ अवैध धन्दामा प्रत्यक्ष संलग्न नभए पनि कुलपतिका रुपमा प्रधानमन्त्रीसमेत त्यसको जिम्मेवारीबाट उम्कन मिल्दैन ।’ उनले भनेका छन् ‘ सो समाचार आएको यति लामो समयसम्म पनि प्रधानमन्त्री  र शिक्षामन्त्री (सह–कुलपति) लगायत पदाधिकारीहरु मौन रहनुले गम्भीर आशंका उब्जाएको छ । ’

चिकित्सा सुधारको माग राखी ११ औ पटक सम्म अनसन बसेका केसी पछिल्लो पटक संसदमा विचाराधीन चिकित्सा शिक्षा विधेयक तत्काल पास गराउन माग गर्दै अनसन बसेका थिए । दुई हप्ता अघि तराइमा बाढी आएका कारण उनले निसर्त अनसन तोडेका थिए । सो अनसन तोडेको ९ दिन पछि वाडीपिडीतलाई उपचार गर्न सप्तरी पुगेका उनी आइतवार काठमाडौ आइपुग्नसाथ तीन बुदे माग राखी १२ औ अनसनको सरकारलाई  अल्टीमेटम दिएका छन् । 

केसीका तीन माग

१) काठमाडौं नेशनल मेडिकल कलेजलाई दिइएको अवैध सम्बन्धन तुरुन्त खारेज गरियोस् । त्रिविले दुरुपयाग गरेका सम्बन्धन, विद्यार्थी भर्ना र शुल्कसम्बन्धी सबै अधिकारहरु आइओएममा तत्काल फर्काइयोस् । 

२)हामीले दिएका सुझाव र माथेमा प्रतिवदेनअनुसार परिमार्जन गरेर चिकित्सा शिक्षा ऐन तत्काल जारी गरियोस् ।

 ३)  त्रिविका उपकुलपति, रेक्टर र रजिस्ट्रारलगायत कार्यकारी परिषद्का सदस्यहरुलाई बर्खास्त गरी तत्काल छानविन र कारवाहीको प्रक्रिया अघि बढाइयोस् । चिकित्सा शिक्षासम्बन्धी न्यायिक जाँचबुझ आयोगको म्याद तत्काल थपेर काम गर्ने वातावरण मिलाइयोस् ।

Hamro Doctor