बंगलादेशमा विचल्लीमा परेका विद्यार्थी : न पढाई छोड्न सक्छन् न अर्को कलेजमा ट्रान्सफर
काठमाडौं,९ मंसिर । बंगलादेशमा एमबीबीएस र बीडिएस अध्ययनरत दुईसय नेपाली विद्यार्थीहरु विचल्लीमा परेका छन् । बंगलादेश मेडिकल एण्ड डेन्टल काउन्सिलले अवैध रुपमा सञ्चालनमा रहेका विभिन्न ३७ वटा कलेजहरुलाई कालोसूचीमा राखिएसँगै त्यहाँ अध्ययनरत नेपाली विद्यार्थीहरु विचल्लीमा परेका हुन् ।
यसअघि नेपालको शिक्षा मन्त्रालयले बंगलादेशका ८ वटा मेडिकल कलेजहरु कालोसूचीमा रहेको भन्दै उक्त कलेजमा पढ्न जान रोक लगाइएको थियो । नेपालीको रहनसहन मिल्ने, भिसाको सजिलो प्रक्रिया लगायत किस्ताबन्दीमा पढाई खर्च तिर्न सकिने भन्दै नेपाली विद्यार्थीहरु मेडिकल शिक्षा अध्ययनको लागि बंगलादेशमा आकर्षित हुने गर्छन् ।
बंगलादेशको मेडिकल काउन्सिलले ३७ वटा मेडिकल कलेजहरुलाई कालोसूचीमा राखेको जानकारी बंगलादेशस्थित नेपाली राजदूतावासले परराष्ट्र मन्त्रालय मार्फत नेपालको शिक्षा मन्त्रालयमा जानकारी गराएको थियो । शिक्षा मन्त्रालयबाट नेपाल मेडिकल काउन्सिललाई समेत बोध गराइएको काउन्सिलका प्रवक्ता डा. दिलिप शर्माले बताए ।
बंगलादेशस्थित नेपाली दूतावासले विचल्लीमा परेका नेपाली विद्यार्थीहरुलाई सेटलमेन्टको लागि प्रयास भइरहेको काउन्सिल प्रवक्ता डा.शर्माले जानकारी दिए । बंगलादेशमा एमबीबीएस र बीडिएस अध्ययनरत विद्यार्थीहरु ठगिने क्रम बढ्दै गएको भन्दै उनले पढाई गर्न जानुअघि सबै पहिले नै बुझ्नुपर्ने बताए ।
बर्षेनी करिब तीन सय विद्यार्थीहरु बंगलादेशमा अध्ययन गर्न जान्छन् । बिदेश मेडिकल शिक्षा पढ्न जाने कुल विद्यार्थीमध्ये ७२ प्रतिशत विद्यार्थीहरु बंगलादेश जाने गर्छन् । सन् २०१६ मा गरिएको अध्ययनका अनुसार मेडिकल शिक्षाको लागि विदेश पढ्ने जाने ४ सय ७८ विद्यार्थीमध्ये ३ सय २८ विद्यार्थी बंगलादेश गएका थिए ।
ठग कन्सल्टेन्सी
दर्ता नभएका मेडिकल कलेजहरुमा समेत भर्नाको लागि भन्दै काठमाडौंमा च्याउसरी खोलिएका कन्सलटेन्सीहरुले विद्यार्थीहरुलाई लोभ्याउँछन् ।
कलेजबाट आउने केही कमिशनको लोभमा कन्सल्टेन्सीले विद्यार्थीहरुलाई कलेजमा भर्ना गराउँछन् । जसको कारण लाखौं रकम तिरेर पढाई गरिरहेका विद्यार्थीहरु अलपत्र पर्छन् ।
यस्तो अवस्थामा न विद्यार्थीले चाहे जस्तो अर्को सम्बन्धन प्राप्त कलेजमा भर्ना ट्रान्सफर हुन पाउँछन् न त पढाईलाई निरन्तरता नै ।
अवैध कलेजहरुको बिगबिगी
बंगलादेशमा कुनै पनि मेडिकल कलेज स्थापनाको लागि त्यहाँको बंगलादेश मेडिकल एण्ड डेन्टल काउन्सिलमा दर्ता गर्नुपर्ने हुन्छ । काउन्सिलमा दर्ता बिना नै मुनाफाका लागि कलेजहरुले नेपाली विद्यार्थीहरु भर्ना लिने गर्छन् । अवैध रुपमा सञ्चालित कलेजहरुले समस्या आउँदा अर्को सम्बन्धन प्राप्त विश्वविद्यालयमा समेत ट्रान्सफर गर्न मान्दैनन् । यस कारण पनि नेपाली विद्यार्थीहरु मर्कामा पर्छन् । क्षमता विद्यार्थी भर्ना संख्याभन्दा बढी भर्ना लिएका कारण बिजिसी ट्रस्ट चिटगाउँमा अध्ययनरत नेपाली विद्यार्थीहरुले एमबीबीएस शिक्षा पूरा गरिसकेपनि बंगलादेश मेडिकल काउन्सिलले दर्ता गर्न मानेनन् ।
बंगलादेशमा अवैधरुपमा सञ्चालित मेडिकल कलेजहरू :
- युनिभर्सिटी अफ साइन्स एन्ड टेक्नोलोजी, चित्तागोंग
- गानोसास्त्य समाज भित्तिक मेडिकल कलेज, सभार
- द पिपुल्स युनिभर्सिटी अफ बंगलादेश
- नर्थन इन्टरनेसनल मेडिकल कलेज, धानमुन्डी, ढाका
- केयर मेडिकल कलेज, इकबाल रोड, मोहम्मदपुर, ढाका
- शाहबुद्धिन मेडिकल कलेज, गुल्सान, ढाका
- आइची मेडिकल कलेज, अब्दुल्लापुर, ढाका
- अब–डिन बसुन्धरा मेडिकल कलेज, साउथ केरानीगन्ज, ढाका
- सफेना डेन्टल कलेज, डिआइटी रोड, ढाका
- नर्थन मेडिकल कलेज, मेडिकल इस्ट एरिया, रंगपुर
- सिटी मेडिकल कलेज, इटाहाटा, गाजिपुर
- जलालाबाद रागिब–रवैया मेडिकल कलेज, सिहालेट
- युनिभर्सिटी अफ साइन्स एन्ड टेक्नोलोजी, चित्तागोंग
- आइबिएआइएस युनिभर्सिटी
- क्विन्स युनिभर्सिटी
- गोनो विश्वविद्यालय
- आशियान मेडिकल कलेज
- आइची मेडिकल कलेज, उत्तरा, ढाका
- बसुन्धरा एडडिन मेडिकल कलेज
- अब्दुल हमिद मेडिकल कलेज
- नाइटिङ्गेल मेडिकल कलेज, नाइटिङ्गेल पोइन्ट, अशुलिया
- बिजिसी ट्रस्ट मेडिकल कलेज, चित्तागोंग
- ब्रम्हानबरिया मेडिकल कलेज
- युनिभर्सल मेडिकल कलेज
- केयर मेडिकल कलेज
- पार्कभ्यु मेडिकल कलेज
- युएस बंगला मेडिकल कलेज
- चट्टाग्राम इन्टरनेसनल मेडिकल कलेज
- सिलहेट इन्टरनेसनल युनिभर्सिटी
- साउथर्न युनिभर्सिटी
- प्रिमियर युनिभर्सिटी
- ब्रिटानिया युनिभर्सिटी
- विक्रमपुर भुइयान मेडिकल कलेज
- मोनोआरा सिक्देर मेडिकल कलेज
- मेराइन सिटी मेडिकल कलेज
- शाह मक्धुम मेडिकल कलेज
- एचएमसिएच मेडिकल कलेज
हाम्रो डक्टर न्यूजका मल्टिमिडिया सम्वाददाता महर्जन स्वास्थ्य बीटका विभिन्न आयाममा फिचर लेख्छन् ।