काठमाडौं, २५ मंसिर । राष्ट्रिय ट्रमा सेन्टरमा खुट्टाको उपचार गर्न आएका लमजुङका कृष्णबहादुर शाहीको अस्पतालले खुट्टाको सट्टा छातीको एक्सरे गरेर पठाएको छ । खुट्टा दुख्ने समस्या भएपछि उपचारका लागि सोमबार बिहान अस्पताल आएका उनलाई खुट्टाको एक्सरे गर्न डाक्टरले सल्लाह दिएका थिए । तर, डाक्टरले लेखेको अक्षर रेडियोलोजिष्टले नबुझेपछि छातीको एक्सरे गरेर पठाइदिएका हुन् । 

ट्रमा सेन्टरमा दिउँसो भेटिएका कृष्णबहादुरले भने ‘उपचार सकेर घर जानु पर्ने बेलामा फेरी एक्सरे गर्नुपर्ने भयो ।’ एक्सरे रिर्पोट डाक्टरलाई देखाउन जाँदा घटना सार्वजनिक भएको हो । उनलाई डाक्टरले पुन खुट्टाको एक्सरे गर्न भनेका छन् । अस्पताल कर्मचारीको लापर्वाहीले पीडा बढाइदिएको उनको दुखेसो छ । ‘अस्पताल आएको पहिलो दिनमै यस्तो भयो बाँकी उपचार कसरी गराउने होला । मलाई त डर लाग्न थालेको छ ।’ उनले भने ।

यस्तो भएको थियो एक्सरे कक्षमा
डाक्टरले लेखेको कागज बोकेर एक्सरे कक्षमा गएका कृष्णबहादुरलाई रेडियोलोजिष्टले कागज हेरेर उभिन लगाए । उनले भने ‘उभिदा पुरै शरीरको एक्सरे आउँछ होला भन्ने ठानेँ । तर, मलाई के थाहा छातीको मात्र आउँछ भनेर । पछि फेरी रेडियोलोजिष्टकोमा जाँदा डाक्टरले लेखेको अक्षर नबुझ्दा यस्तो समस्या भएको बताए ।’ छोटकरीमा लेखेको ‘सी’ (चेष्ट) र एल (लेग) अक्षर स्पष्ट नहुँदा यस्तो भएको अस्पतालले जनाएको कृष्णबहादुरका आफन्तले बताए । 
 

Hamro Doctor