महानिर्देशक बनेको १० दिनमै डा. श्रेष्ठको अवकाश
काठमाडौं, २१ फागुन । स्वास्थ्य सेवा विभागका महानिर्देशक डा. विनोदमान श्रेष्ठले सोमबार अवकाश पाएका छन् ।
महानिर्देशकका रुपमा पदाबहाली गरेको १० दिनपछि उनले उमेरहदका कारण सेवाबाट अनिवार्य अवकाश पाएका हुन् ।
स्वास्थ्य मन्त्रालयले विभागको महानिर्देशकको जिम्मेवारी दिएपनि असन्तुष्टि पोख्दै आएका डा. श्रेष्ठले ९ दिनपछि मात्र पदभार ग्रहण गरेका थिए । ११ फागुनबाट पदबहाली गरेका डा. श्रेष्ठले १० दिनपछि सोमबार अनिवार्य अवकाश पाएका हुन् ।
निवर्तमान स्वास्थ्यमन्त्री दिपक बोहराले डा. राजेन्द्र पन्तलाई विभागको महानिर्देशकबाट हटाएर डा. तारानाथ पौडेललाई महानिर्देशकको जिम्मेवारी दिएको थियो ।
डा. पन्तले पदाबधि छँदै गैरकानुनी तरिकाले पदीय जिम्मेवारीबाट हटाएको भन्दै सर्वोच्च अदालतमा गएका थिए । सर्वोच्च अदालतबाट पुनर्बहाली पाएपछि डा. पन्त महानिर्देशकको हैसियतमा हाजिर गर्दै आएका थिए ।
निवर्तमान स्वास्थ्यमन्त्री बोहराले जाँदाजाँदैै स्वास्थ्य मन्त्रालयमा प्रमुख विशेषज्ञ चिकित्सकका रुपमा रहेका डा. श्रेष्ठलाई विभागको महानिर्देशकको जिम्मेवारी दिएका थिए ।
