भारतमा कोरोना संक्रमितको संख्या ५० लाख नाघ्यो, ८२ हजारभन्दा बढीको मृत्यु
भारत, ३१ भदौ । भारतमा कोरोना संक्रमितको संख्या ५० लाख नाघेको छ ।
भारतीय स्वास्थ्य मन्त्रालयका अनुसार गत २४ घन्टामा ८१ हजार ९ सय ६४ नयाँ संक्रमित थपिएका छन् । कोरोना संक्रमणका कारण विश्वकै दोस्रो प्रभावित मुलुक भारतमा कोरोना संक्रमणका कारण ५० लाख १८ हजार नाघेको छ ।
भारतमा कोरोना संक्रमण अनियन्त्रित हुँदै गएको र महामारीका कारण मानिसहरु तीव्र गतिमा चपेटामा आउन थालेको छ । भारतमा दिनकै ९० देखि ९७ हजारका दरले कोरोना संक्रमित थपिँदै गएको छ । जुन संख्या एकैदिन थपिनेमा विश्वकै सबैभन्दा धेरै हो ।
यस्तै भारतमा कोरोना संक्रमणका कारण हालसम्म ८२ हजारभन्दा बढीको मृत्यु भइसकेको छ भने हाल देशभर ९ लाख ९३ हजार ७५ सक्रिय संक्रमितको संख्या रहेको छ ।
गसैगरि भारतमा हालसम्म कोरोना भाइरसका कारण संक्रमित भएकामध्ये ३९ लाख ३१ हजार ३ सय ५६ जना स्वस्थ भइसकेको छन् ।
कोरोना महामारीको प्रभाव सबैभन्दा बढी महाराष्ट्रमा परेको छ । महाराष्ट्रपछि भारतको आन्ध्र प्रदेश, कर्नाटक, उत्तर प्रदेश, तमिलनाडू र दिल्ली सबैभन्दा बढी प्रभावित बनेको छ ।
