भारतमा कोरोनाका कारण बालविवाह र बेचबिखनका घटना बढ्यो
एजेन्सी, २ असोज । कोरोना भाइरसका कारण भारतमा बाल विवाह र बेचबिखनका घटना बढेका छन् ।
कोरोना भाइरसको महामारीपछि भएको लकडाउन लगायतका कारण बढेको बेरोजगारीका कारण बालविवाह र बेचबिखनका घटना बढेका पाइएको बीबीसीले जनाएको छ ।
कोरोनाको महामारीपछि बेरोजगारी बढेको, विद्यालय बन्द भएका जस्ता कारणले भारतमा बालिकाहरु जोखिममा परेका छन् ।
घरको आर्थिक स्थिति कमजोर भएका कारण बालिकाहरुको सानै उमेरमा नै विवाह गरिदिने घटना बढेका छ्न् ।
भारतको कानुनले १८ वर्षमुनिका बालिकाको विवाहमा रोक लगाएको छ । संयुक्त राष्ट्र सङ्घीय बालकोष यूनिसेफका अनुसार भारतमा हरेक वर्ष १५ लाख बालिकाको कम उमेरमा नै विवाह हुने गरेको छ ।
सरकारी तथ्याङ्कअनुसार कोरोनापछिको लकडाउनका कारण रोजगारी गुमाएपछि एक करोड मानिस घर गाउँ फर्किएका छन् ।
घरगाउँ फर्किएका केही अभिभावकले छोरीको सानै उमेरमा विवाह गरिदिने गरेका छन् ।
