भुटानमा पहिलो पटक कोरोना संक्रमितको मृत्यु
एजेन्सी, २५ पुस । भुटानमा पहिलो पटक एक जना कोरोना संक्रमितको मृत्यु भएको छ।
कोरोना संक्रमित ३४ वर्षीय एक पुरुषको शुक्रबार मृत्यु भएको भुटानी स्वास्थ्य मन्त्रालयले जनाएको छ। मृत्यु हुने व्यक्ति कलेजो तथा मिर्गौलाको समस्याबाट समेत पीडित भएको जनाइएको छ।
भुटानमा हालसम्म कोरोना संक्रमितको संख्या ७ सय ७१ पुगेको छ भने ४ सय ६५ जना संक्रमणमुक्त भएका छन्। सक्रिय संक्रमितको संख्या ३ सय ५ रहेको छ। हालसम्म ३ लाख २१ हजार ८ सय ४४ जनाको परीक्षण भएको भुटानको स्वास्थ्य मन्त्रालयले जनाएको छ।
