धनगढी, २६ भदौ । संघीय सरकारले सुदूरपश्चिमका लागि कोरोना भाइरस विरुद्धको पर्याप्त खोप पठाउन आनाकानी गरेको आरोप लागेको छ । 

हालसम्म सुदूरपश्चिम प्रदेशका ६ लाख नागरिकले मात्रै कोरोना भाइरस विरुद्धको खोप लगाएका छन् । जसमा ४ लाख बढीले पूर्ण खोप लगाए पनि थप डोज पठाउन संघीय सरकारले आनाकानी गरिरहेको छ । अन्य प्रदेशको तुलनामा कम डोज पाएको सुदूरपश्चिमलाई पर्याप्त खोप दिन संघीय सरकार ढिलाई गरिरहेको हो । 

पछिल्लो समयमा प्रदेशमा दोस्रो डोज लगाउनका लागि ९८ हजार भेरोसेल खोप प्राप्त भएको स्वास्थ्य आपूर्ति व्यवस्थाप केन्द्रका प्रमुख पदम विष्टले बताए । ‘दोस्रो डोजका  लागि स्वास्थ्य विभागबाट ९८ हजार ८ सय डोज आएको छ,’ उनले भने । भदौ ३० गतेबाट सञ्चालन हुने कक्षा १२ को परीक्षामा सहभागी हुने विद्यार्थीका लागि पनि १५ हजार डोज मात्रै पठाइएको छ । जुन खोप प्रदेशका विद्यार्थीका लागि कम हुने स्वास्थ्य आपूर्ति व्यवस्थापन केन्द्रका प्रमुख विष्टले बताए ।
 
पहिलो डोज पनि नपाएका प्रदेशवासीका लागि भने कोरोना भाइरस विरुद्धको खोप पठाउन वेवास्ता भइरहेको छ । विगतमा विभिन्न देशबाट सहयोग स्वरुप प्राप्त भएको लगायत नेपाल सरकारले खरिद गरेको खोपको केही मात्रा सुदूरपश्चिममा पठाइएको थियो ।
 
अहिले संघीय सरकारले पर्याप्त रुपमा खोप पठाउन उदासिनता देखाएपछि प्रदेशको खोप अभियान नै ठप्प जस्तै छ । ‘प्रयाप्त मात्रामा सबैलाई पुग्नेगरी खोप पठाउन त गाह्रो हुन्छ,’ सुदूरपश्चिमको सामाजिक विकास मन्त्रालयका प्रवक्ता नरेन्द्र सिंह कार्कीले भने, ‘थप डोजका लागि संघीय सरकारसँग आग्रह गरेका छौं ।’

Hamro Doctor