भारतमा तीन करोड बालबालिकाले लगाए कोरोनाविरुद्वको खोप
एजेन्सी,२८ वैशाख । भारतमा तीन करोडभन्दा बढी बालबालिकाले कोरोना भाइरसविरुद्धको कम्तीमा एउटा खोप लगाएका छन् ।
संघीय स्वास्थ्य मन्त्रालयका अनुसार खोप लगाएका बालबालिका भने १२ देखि १४ वर्षसम्मको उमेरको रहेका छन् ।
खोप लगाएका बालबालिकालाई खोप लगाएर सुरक्षित भएको भन्दै संघीय स्वास्थ्य मन्त्री मनसुख मन्डावियाले बधाइ दिएका छन् ।
खोप लगाएका बालबालिका मध्ये १ करोड २ लाख २ सय ७२ जनाले दोस्रो खोप पनि लगाएको स्वास्थ्य मन्त्रालयको तथ्याङ्कमा उल्लेख छ।
त्यसैगरी १५ देखि १८ वर्षसम्मका भने ५ करोड ८७ लाख ७० हजार ४ सय २८ ले कम्तीमा एउटा खोप लगाएका छन् । ती मध्ये ४ करोड ३३ लाख आठ हजार ६ सय ५१ जनाले दोस्रो खोप लगाएका छन् ।
भारतमा १२ देखि १४ वर्षसम्मका बालबालिकालाई कोरोना भाइरस विरुद्धको खोप लगाउन गत मार्च १६ देखि सुरु गरिएको हो।
