भारतले दियो पहिलो स्वदेशी खोपलाई आपतकालीन प्रयोगका लागि अनुमति
भारत, १९ पुस । भारत सरकारले थप एक कोरोना विरुद्धको खोपलाई आपतकालीन प्रयोगका लागि अनुमति दिएको छ ।
शनिवार भारत सरकारले स्वदेशी कम्पनीले विकास गरेको कोरोना विरुद्धको खोप कोभ्याक्सलाई आपतकालीन प्रयोगका लागि अनुमति दिएको हो । योसँगै भारतीय क्रम्पनी भरत बायोएनटेक कोरोना विरुद्धको खोपको आपतकालीन प्रयोगका लागि अनुमति पाउने पहिलो स्वदेशी खोप पनि बनेको छ । तर, यसको अन्तिम अनुमति भने पाउन बाँकी छ ।
यसअघि भारत सरकारका विशेषज्ञ समूहले अक्सफोर्ड विश्वविद्यालय र एस्ट्राजेनेकाले विकास गरेको खोपलाई मान्यता दिएको थियो ।
भारतीय कम्पनी भरत बायोटेकको कोरोना विरुद्धको खोप कोभ्याक्सीनलाई लिएर केही प्रश्नहरु उठेपछि त्यस विषयमा भारत सरकारले थप अध्ययन गर्ने पनि बताएको छ ।
भारतले यस वर्षको जुनसम्म ३० करोड मानिसलाई कोरोना विरुद्धको खोप लगाउने तयारी गरेको छ । जसका लागि शनिवार ड्राइ रन पनि गरिएको छ । खोपको अभ्यासको क्रममा भारतका दश हजारभन्दा बढी स्वास्थ्यकर्मी सहभागि भएका थिए ।
कोरोना विरुद्धको खोप विकास गर्नेमा अमेरिकी कम्पनी फाइजर र बायोएनटेक तथा मोडर्ना अग्रस्थानमा छ भने बेलायतको अक्सफोर्ड र एस्ट्रेजेनेका दोस्रो स्थानमा छ ।
