नेपालमा कोरोना संक्रमितको संख्या १५ हजार नाघ्यो, ३२ जनाको मृत्यु
काठमाडौं, १९ असार । नेपालमा एकैदिन ७ सय ४० जनामा कोरोना भाइरसको संक्रमण पुष्टि भएको छ ।
यो एकैदिन भेट्ने हालसम्मकै धेरै संख्या रहेको स्वास्थ्य तथा जनसंख्या मन्त्रालयले जनाएको छ ।
स्वास्थ्य तथा जनसंख्या मन्त्रालयले कोभिड १९ सम्बन्धी नियमित जानकारी दिने क्रममा पछिल्लो २४ घन्टामा विभिन्न प्रयोगशालामा गरिएको परीक्षणमा थप ७ सय ४० जनामा कोरोना भाइरसको संक्रमण पुष्टि भएको बताएको हो ।
मन्त्रालयका प्रवक्ता डा जागेश्वर गौतमले नेपालमा कोरोना भाइरसका कारण संक्रमित हुनेको संख्या १५ हजार नाघेको बताए । हालसम्म नेपालमा कोरोना भाइरसका कारण संक्रमित हुनेको संख्या १५ हजार २ सय ५९ पुगेको उनले बताए ।
यस्तै पछिल्लो २४ घन्टामा ८ सय २३ जना निको भएका छन् ।
नेपालमा कोरोना संक्रमण पश्चात निको हुनेको संख्या ६ हजार १ सय ४३ पुगेको छ ।
यस्तै काठमाडौं बानेश्वरका एक जना ८५ वर्षीय पुरुषको कोरोना भाइरस संक्रमणका कारण मृत्यु भएको र नेपालमा कोरोनाका कारण मृत्यु हुनेको संख्या ३२ पुगेको प्रवक्ता गौतमले बताए ।
