कोरोनाविरुद्धको चिनियाँ खोप विश्वसनीय नभएको विश्व स्वास्थ्य संगठनको दावी
एजेन्सी, २४ वैशाख । विश्व स्वास्थ्य संगठनले कोरोना भाइरस विरुद्धको चिनियाँ खोप विश्वसनीय नभएको दावी गरेको छ ।
चीनले पठाएको खोप परीक्षणका नतिजाहरुको अध्ययनपछि संगठनका विज्ञहरुले चीनले विकास गरेको कोरोनाविरुद्धको खोपमा विश्वास गर्न सकिने पर्याप्त आधारहरु नभएको बताएका हुन् । यद्यपी यसबारेमा औपचारिक जानकारी सार्वजनिक हुन बाँकी नै रहेको सञ्चार संस्था रोयर्टसले जनाएको छ ।
खोपले कोरोनाविरुद्ध लड्नसक्ने भएपनि यसले गम्भीर साइड इफेक्टहरु पार्न सक्नेतर्फ विश्व स्वास्थ्य संगठनले संकेत गरेको हो ।
डब्लूएचओका वरिष्ठ वैज्ञानिक सौम्या स्वामिनाथनले सिनोफार्मले उपलब्ध गराएको परीक्षणका नतिजाहरुको अध्ययन सकिएको र चाँडै उक्त प्रतिवेदन सार्वजनिक गरिने जानकारी दिइन् ।
विश्व स्वास्थ्य संगठनले आफ्नो नियमित मिडिया ब्रिफिंगको क्रममा यसअघि नै चीनले विकास गरेको कोरोनाविरुद्धको खोपबारे अध्ययन भइरहेको र खोप प्रभावकारिताका बारेमा चाँडै नतिजा सार्वजनिक गरिने बताएको थियो ।
बेइजिंगस्थित सिनोर्फामले भने आधिकारिक प्रतिवेदन सार्वजनिक भएपछि मात्रै प्रतिक्रिया दिने जनाएको छ ।
